Владата очекува од понеделник да дојде до намалување на цената на бензините, додека цената на дизелот ќе остане иста или ќе се зголеми за половина денар, соопшти премиерот Христијан Мицкоски. Тој посочи дека мерката за намалување на ДДВ дава очекувани резултати и ја намали цената на горивата на домашниот пазар.
„Засега состојбата е стабилна и нема потреба од ограничувања. Владата ја следи ситуацијата и доколку има потреба, мерката ќе биде продолжена уште две недели или ќе се намалат акцизите“, изјави Мицкоски.
Регулаторната комисија за енергетика во понеделник треба да ги објави новите цени на горивата, откако минатиот понеделник цената на бензините остана иста, а на дизелот се зголеми за 3,5 денари по литар.
Експертите предупредуваат дека, по случувањата на Блискиот Исток, се очекува зголемување на цените на храната и земјоделските производи поради растот на нафтата на светските берзи и поскапувањето на ѓубривата. Сепак, за разлика од минатата година, оваа година не се очекува драстичен пораст на цените на енергенсите.
