По повеќе од три и пол децении служба, легендарниот американски претседателски авион „Ер Форс Уан“ се подготвува за пензионирање. Информацијата ја потврди директорот за комуникации на Белата куќа, Стивен Чунг, кој соопшти дека авионот со ознака VC-25A наскоро ќе биде повлечен од активна употреба.
Неговото место ќе го заземат три модифицирани авиони „Боинг 747-800“, кои се прилагодуваат за да ги исполнат строгите безбедносни и комуникациски стандарди што ги бара американскиот претседателски транспорт. Меѓу нив е и луксузниот авион дониран од Катар, кој ќе служи како привремено решение додека не бидат целосно подготвени останатите летала.
Според американските воздухопловни сили, стариот „Ер Форс Уан“ нема да заврши на отпад, туку ќе остане дел од нивната флота.
Новиот претседателски авион веќе ги поминал клучните модификации и се очекува да биде претставен во текот на летото. За неговото прилагодување биле потрошени околу 400 милиони долари. Новите летала ќе бидат обоени во црвена, бела, златна и темносина боја, според дизајнот предложен за време на првиот мандат на американскиот претседател Доналд Трамп.
Сѐ уште не е познато кога новите авиони официјално ќе влезат во употреба, ниту каква ќе биде конечната улога на сегашните VC-25A откако ќе бидат заменети.
Претседателските авиони VC-25A првпат полетаа во 1990 година, за време на мандатот на Џорџ Х. В. Буш. Во текот на годините тие беа сведоци на бројни историски настани, меѓу кои и нападите од 11 септември 2001 година, кога претседателот Џорџ В. Буш беше префрлен од Флорида во Вашингтон по терористичките напади во Њујорк.
Авионот служел и за меѓународни државнички мисии, вклучително и патувањето на американските претседатели Бил Клинтон, Џими Картер и Џорџ Х. В. Буш во Израел на погребот на премиерот Јицак Рабин во 1995 година.
Освен напредната комуникациска и безбедносна опрема, „Ер Форс Уан“ располага со претседателски апартман, канцеларија, конференциска сала, две кујни способни да подготват до 100 оброци истовремено, медицински оддел и капацитет за дополнување гориво во лет, што му овозможува речиси неограничен дострел.
Со заминувањето на VC-25A завршува едно значајно поглавје во историјата на американското претседателско воздухопловство, а новата генерација авиони треба да ја продолжи традицијата на најпрепознатливиот државнички авион во светот.
…
