Пет лица се повредени, од кои две потешко, во сообраќајна несреќа што на 19 септември се случила на магистралниот пат Охрид–Ресен, во близина на охридското село Опеница.
Според информациите од полицијата, несреќата се случила околу 17:30 часот, при судир на две патнички возила.
Во сообраќајката учествувале „сузуки витара“ со скопски регистарски ознаки, управувана од 67-годишен државјанин на Велика Британија, и „опел“ со битолски регистарски ознаки, управуван од 28-годишен жител на битолското село Буково.
Д.С. и И.З., кои биле сопатници во „опелот“, се здобиле со тешки телесни повреди. Повредите биле констатирани во Специјалната болница за ортопедија и трауматологија „Св. Еразмо“ во Охрид.
Телесни повреди добиле и возачот на „сузуки витара“, како и две сопатнички во „опелот“. Нивните повреди биле констатирани во Општата болница во Охрид.
По насоки на јавен обвинител, увид на местото на несреќата извршила екипа на СВР Охрид.
Полицијата продолжува со преземање мерки за утврдување на причините и сите околности под кои дошло до судирот.
