Министерот за национална безбедност на Израел, Итамар Бен-Гвир, изјави дека неговата земја нема намера да го земе предвид ставот на Европска Унија во врска со новоусвоениот закон за смртна казна.
„Испишавме историја. Отсега, секоја мајка во Јудеја и Самарија ќе знае дека ако нејзиното дете почне да убива, го чека најстрога казна“, изјави Бен-Гвир, додавајќи дека Израел нема да подлегне на надворешни притисоци или закани.
Контроверзниот закон беше усвоен во третото и последно читање во парламентот, каде што од 110 пратеници, 62 гласаа „за“. Иницијативата доби поддршка и од премиерот Бенјамин Нетанјаху.
Усвојувањето на законот беше проследено со реакции и во самата сала. Дел од пратениците симболично ја одбележаа одлуката носејќи значки со мотив на јамка, што предизвика дополнителни контроверзии во јавноста.
Со новите законски измени, Израел испраќа порака за заострување на казнената политика, додека критиките од европските институции продолжуваат да се интензивираат.
