Европската унија од 10 април го воведува ЕЕС – нов систем за биометриска проверка на патници при влез во Шенген зоната, со што значително се менуваат правилата на граничните премини.
Системот ќе опфаќа земање отпечатоци од прсти и фотографирање на лицето при првиот влез, додека при следните патувања ќе се користи автоматско препознавање. Дополнително, ќе се евидентираат сите влезови и излези од ЕУ, со цел подобра контрола и откривање на злоупотреби, вклучително и лажни идентитети.
Според податоците на Европската комисија, досега во системот се регистрирани околу 45 милиони патници. Првичните резултати покажуваат дека повеќе од 24.000 лица биле одбиени на границите поради неисполнување на условите за влез, додека над 600 лица биле идентификувани како безбедносен ризик.
Новите правила ќе влијаат и на времето на чекање на граничните премини. Се очекува задржување од две до пет минути по патник, бидејќи во одредени случаи ќе се бара излегување од возилата за спроведување на проверките. Сепак, граничните служби ќе имаат можност привремено да ги суспендираат биометриските проверки во периоди на големи гужви, особено во туристичката сезона.
Доколку чекањето на границите надмине три часа, службениците ќе можат да се вратат на класични пасошки контроли, како што беше практиката досега.
Промените веќе предизвикуваат реакции кај професионалните возачи, кои предупредуваат дека поради строгото спроведување на правилото за престој од 90 дена во рок од шест месеци, дел од нив биле вратени од границите на ЕУ.
