Германскиот министер за надворешни работи Јохан Вадефул повика Европската унија да го преиспита принципот на едногласност во надворешната и безбедносна политика. Според него, едноединечно вето од поединечни земји-членки ја успорува способноста на ЕУ да делува брзо и ефективно во кризни ситуации, јавува Дојче Веле.
„Поддржувам воведување на систем на квалификувано мнозинство. Случувањата поврзани со Украина и санкциите против Русија покажуваат дека сегашниот модел не е доволно ефикасен“, изјави Вадефул.
Во Советот на ЕУ, чувствителните области како заедничката надворешна и безбедносна политика се одлучуваат со едногласност – едно вето може да блокира цел процес. Наспроти тоа, квалификуваното мнозинство веќе се применува во многу други области, каде за донесување на одлука се потребни најмалку 55% од земјите-членки (15 држави) кои претставуваат најмалку 65% од населението на ЕУ. Овој систем овозможува Советот да остане функционален дури и ако некоја земја гласа „против“.
Иницијативата за поголема употреба на квалификувано мнозинство не е нова – повеќе министри за надворешни работи, меѓу кои и поранешната германска министерка Аналена Бербок, веќе се залагаа за оваа промена.
Последниот пример кој ја засили дебатата е Унгарија, предводена од премиерот Виктор Орбан, која го блокира 90-милијардниот кредит за Украина. Орбан ја обвинува Украина за попречување на обновувањето на руските испораки на нафта преку нафтоводот „Дружба“, додека критичарите сметаат дека станува збор за предизборна тактика.
