По триесет и четврти пат, Општина Карпош ја продолжува својата долгорочна хуманитарна традиција, доделувајќи над 140 пакети со основни прехранбени и хигиенски продукти на граѓани и семејства во социјален ризик.
Во пакетите, кои се собирани со голема енергија и срце, беа вклучени зејтин, брашно, ориз, конзервирани и кондиторски производи, како и средства за лична хигиена. Продуктите се донирани од учениците од општинските основни училишта, децата од јавните детски градинки и вработените во општинската администрација.
Оваа акција има двојна традиција. Секоја пролет, во пресрет на Велигден, и секоја есен, во чест на роденденот на Општина Карпош, кога заедницата покажува вистинска солидарност и грижливост кон оние кои најмногу имаат потреба.
Градоначалникот Сотир Лукровски и целата општинска администрација истакнуваат дека нивната мисија не завршува со еднократна помош. Тие се посветени на тоа да ги поддржуваат сограѓаните на долг рок, не само со материјална помош, туку и со активности кои им овозможуваат да се вклучат во пазарот на трудот и да се издигнат над социјалната ранливост.
