Во Софија се случи нов сериозен инцидент што повторно го отвори прашањето за безбедноста на јавните функционери, откако познатиот по своите ексцентрични јавни настапи Атанас Стефанов предизвика драма пред Министерството за надворешни работи.
Стефанов, кој често се појавува облечен во свештеничка облека и носи крст, застанал директно пред службеното возило на бугарската министерка за надворешни работи Надежда Нејнски во моментот кога таа ја напуштала институцијата. Според сведоштвата и објавените видеа на социјалните мрежи, тој почнал гласно да извикува клетви и навреди кон неа, создавајќи напната и хаотична ситуација.
И покрај обидот да го блокира движењето, возилото успеало да се оттурне од местото, додека обезбедувањето интервенирало и го оттурнало мажот, спречувајќи поголем инцидент. Нема информации за повредени, но настанот предизвика сериозна загриженост во јавноста.
Дополнителна тежина на случајот му дава и реакцијата на Софиската света митрополија, од каде претходно соопштија дека Стефанов не е дел од свештенството и нема никаква дозвола да носи свештеничка облека или верски обележја, што отвора дилеми за злоупотреба на религиозни симболи во јавниот простор.
Ова не е прв ваков инцидент поврзан со него. Во изминатиот период, Стефанов бил вмешан и во други нарушувања на јавниот ред и мир, вклучително и упад во партиска канцеларија каде се однесувал агресивно кон присутните. Минатата година, тој предизвика сличен скандал кога се фрли пред колоната возила на украинскиот претседател Володимир Зеленски во центарот на Софија, извикувајќи навредливи пароли, по што беше приведен од полицијата.
Последниот инцидент дополнително ја засилува загриженоста за повторливоста на ваквите ситуации и ја наметнува потребата од поостри безбедносни мерки и институционална реакција, со цел да се спречат потенцијално поопасни сценарија во иднина.
ВИДЕОТО ПОГЛЕДНЕТЕ ГО НА СКОПЈЕ1
