Администрацијата на американскиот претседател Доналд Трамп разгледува радикални чекори за „казнување“ на сојузниците од НАТО кои, според официјални кругови во Вашингтон, не дале доволна поддршка на САД и Израел во нивниот конфликт со Иран, пишува „Волстрит журнал“, повикувајќи се на висок функционер што сакал да остане анонимен.
Според изворот, една од идеите што се разгледува е ре‑распоредување на американските војници од земјите што „не биле сојузнички“ кон оние членки на НАТО кои, како што велат, „поактивно ја поддржуваат воената мисија на Вашингтон на Блискиот Исток“.
Портпаролката на Белата куќа, Каролин Ливит, откри дека Трамп планира да ја стави на маса и опцијата за целосно повлекување на САД од Северноатлантската алијанса во разговорите со генералниот секретар на НАТО, Марк Руте. Ливит рече дека двајцата веќе имале „отворена расправа“ околу ова прашање и дека Трамп јавно ја довел во прашање иднината на НАТО.
Според она што таа го пренесе, Трамп остро ги критикувал некои членки на НАТО, тврдејќи дека „не поминале низ тестот“ бидејќи, како што истакнал, „ни го свртеа грбот“ во најтешките моменти.
Тоа не е првпат Трамп да ги напаѓа сојузниците во Алијансата. Тој веќе порача дека неговото разочарување од НАТО е „огромно“ поради улогата на некои земји во тековниот конфликт со Иран, оставјќи, како што рече, „длабоки последици врз алијансата што нема лесно да исчезнат“.
