Повеќе од 27.000 лица биле одбиени при обид за влез во Европската Унија од почетокот на етапното воведување на новиот систем за гранична контрола (EES) во октомври минатата година, соопшти Европската комисија. Од нив, околу 700 лица биле идентификувани како директна безбедносна закана.
Според податоците, од стартот на примената се регистрирани над 52 милиони влегувања и излегувања од Унијата. Комисијата го поздрави целосното воведување на системот за влез и излез (EES), нагласувајќи дека автоматизираната контрола значително ја подобрува ефикасноста на граничните процедури.
Благодарение на новата технологија, регистрацијата на еден патник трае во просек околу 70 секунди, што придонесува за побрз проток на патници на граничните премини.
Системот ги заменува традиционалните рачни печати во пасошите и овозможува собирање на лични и биометриски податоци, со цел поефикасно следење на престојот и спречување на негово пречекорување.
Новите правила се однесуваат на државјани од трети земји кои не се дел од ЕУ или Шенген-зоната, вклучително и Исланд, Лихтенштајн, Норвешка и Швајцарија, а важат за краткорочен престој до 90 дена.
И покрај почетните реакции од секторот за воздушен транспорт поради можни одложувања, Европската комисија потврди дека системот сега е успешно имплементиран на сите гранични премини на надворешните граници на ЕУ.
