САД и Иран сè уште се далеку од конечен договор, а главната пречка останува нуклеарната програма на Техеран, од која иранските власти не сакаат да се откажат, изјави американскиот потпретседател Џеј Ди Венс.
“Лошата вест е дека не постигнавме договор. И мислам дека тоа е многу полошо за Иран отколку за САД“, изјави Венс, додавајќи дека американската делегација се враќа дома без резултат.” Изјави тој
Според неговите оценки, токму прашањето за збогатувањето ураниум и потенцијалот за развој на нуклеарно оружје е клучниот камен на сопнување во преговорите меѓу двете земји. Венс нагласил дека без јасни гаранции дека Иран ќе се откаже или значително ќе ја ограничи својата нуклеарна програма, не може да се постигне траен договор.
И покрај дипломатските напори и посредувањето на повеќе држави, разговорите остануваат сложени и неизвесни. Во последниот период имаше обиди за деескалација, вклучително и привремени договори и иницијативи за прекин на огнот, но тие се оценуваат како кревки и нестабилни.
Од друга страна, Иран континуирано тврди дека неговата нуклеарна програма има исклучиво мирољубив карактер и е наменета за енергетски потреби, додека САД и нивните сојузници се сомневаат дека Техеран се обидува да развие нуклеарно оружје.
Дополнително, дел од дипломатските иницијативи предвидуваат можност Иран привремено да ја ограничи програмата за да се намалат тензиите, но без целосно откажување – што повторно е неприфатливо за Вашингтон.
Ситуацијата дополнително се комплицира поради пошироките безбедносни прашања во регионот, како што се ракетната програма на Иран и неговото влијание на Блискиот Исток, кои исто така се дел од преговарачката агенда.
Во вакви околности, аналитичарите предупредуваат дека иако постои политичка волја за договор, вистинскиот пробив ќе зависи од тоа дали ќе се најде компромис токму околу нуклеарната програма – прашање кое засега останува најголемата пречка.
