Со приближувањето на летната туристичка сезона, илјадници македонски граѓани се подготвуваат за одмор во Грција – една од најомилените дестинации. Но, годинава грчките власти најавуваат засилени контроли и ригорозно спроведување на правилата, а нивното непочитување може сериозно да го „испразни“ вашиот буџет.
Иако дел од правилата на прв поглед изгледаат безопасно, казните што следуваат можат да достигнат и до неколку илјади евра.
Заборавете на штиклите на историски локалитети
Посетата на познатите археолошки места има свои строги правила. На пример, носењето обувки со високи потпетици е строго забрането, со цел да се заштити древниот мермер. Доколку не се придржувате, може да бидете спречени да влезете, па дури и казнети со суми до 900 евра.
Пушење во автомобил? Казните се шокантни
Грција има нулта толеранција за пушење во возило кога има деца. Ако во автомобилот има дете под 12 години, казните се драстични:
- 1.500 евра за приватно возило
- до 3.000 евра за службено или изнајмено возило
Покрај тоа, возачот останува без возачка дозвола на еден месец – без разлика кој пушел.
Сообраќајните прекршоци под лупа
Ова лето се очекуваат засилени контроли, вклучително и камери што автоматски ги регистрираат прекршоците. Најчестите казни вклучуваат:
- Алкохол зад волан – до 1.200 евра
- Пречекорување брзина – од 100 евра
- Поминување на црвено – 700 евра
- Неврзан појас – 350 евра
- Користење мобилен телефон – 100 евра
Паркиравте погрешно? Можно е да останете без таблички
Непрописното паркирање, особено во туристичките зони и близу плажи, може веднаш да резултира со одземање на табличките. Дополнително, дозволата може да ви биде одземена до 10 дена, а сообраќајната до 20 дена.
Не допирајте ништо во музеите
Во музеите и на археолошките локалитети важи строго правило – експонатите не смеат да се допираат. Прекршувањето може да доведе до санкции, но и до отстранување од објектот.
Внимавајте како ја користите водата
Поради ограничени ресурси во летниот период, во одредени региони важат рестрикции. Миење автомобили на улица или во двор е забрането, а некаде има ограничувања и за наводнување.
Климата не е за целодневна употреба
Сопствениците на сместувања апелираат туристите да не ги оставаат клима уредите вклучени додека се на плажа. Освен што создава големи трошоци, ова има и негативно влијание врз животната средина.
