Македонски државјанин, возач на камион, предизвикал сообраќајна несреќа со материјална штета на регионалниот пат Солун – Калохори, откако управувал возило под дејство на алкохол.
Според информациите на грчката новинска агенција АНА-МПА, станува збор за 49-годишен возач кај кого алкотестот покажал вредности од 0,76 и 0,78 милиграми алкохол на литар издишан воздух, што е над дозволеното ниво.
Возачот бил уапсен и денеска изведен пред Судот за прекршоци во Солун, каде што бил прогласен за виновен за опасно возење и возење под дејство на алкохол. Судот му изрекол казна затвор од 15 месеци со можност за откуп, која била претворена во парична казна од по 10 евра дневно, што вкупно изнесува околу 4.500 евра.
По изрекувањето на пресудата, возачот поднел жалба и бил пуштен на слобода до нејзиното разгледување.
Во својата одбрана, како што пренесува АНА-МПА, тој изјавил дека при движење го закачил ретровизорот на паркирано возило и изразил жалење за слученото, додавајќи дека не може да го врати времето назад.
…
