Од 18 јуни 2026 година, Грција воведува построги правила за задолжителната опрема во возилата, што директно ќе ги засегне и странските возачи, вклучително и македонските туристи кои транзитираат или летуваат во земјата.
Клучната промена се однесува на комплетите за прва помош, кои отсега ќе мора целосно да одговараат на европскиот стандард DIN 13164:2022 или еквивалентен ISO норматив. Со ова се укинува досегашната флексибилност и се воведува строго дефинирана содржина на аптечките.
Според новите правила, секое возило ќе треба да има комплет со вкупно 16 задолжителни ставки. Меѓу новитетите се термално спасувачко ќебе и заштитни медицински маски, кои стануваат задолжителен дел од опремата.
Во стандардизираниот сет се вклучени стерилни завои во различни големини, газа за изгореници, еластични бинтови, триаголна марама, медицинска леплива лента, фластери, ножици за прва помош, ракавици за еднократна употреба, дезинфекциски марамчиња, како и упатство за укажување прва помош. Целта е зголемување на подготвеноста на возачите во итни ситуации и намалување на ризикот од дополнителни повреди.
Посебен акцент се става и на квалитетот на опремата. Сите елементи мора да имаат CE-ознака, а возачите се должни редовно да го проверуваат рокот на траење на стерилните материјали. Аптечката треба да биде сместена на лесно достапно место во возилото.
За непочитување на правилата е предвидена казна од 30 евра, доколку комплетот е нецелосен или не ги исполнува стандардите.
Воедно, грчките власти најавуваат и пошироки сообраќајни реформи со цел зголемување на безбедноста. Меѓу нив се ограничување на брзината на 30 км/ч во урбани зони и проширување на системот на паметни камери за автоматско санкционирање на прекршоци.
…
