Премиерот Христијан Мицкоски изјави дека индустриското производство во земјата бележи значаен пораст и дека, според неговите оценки, државата се издвојува како една од најдинамичните во регионот кога станува збор за економската експанзија.
Според Мицкоски, последните шест квартали носат просечен економски пораст од околу 3,5 отсто, што, како што рече, е значително над европскиот просек кој се движи под 2 отсто. Тој додаде дека иако во минатото имало повисоки стапки на раст, тогаш и европската економија се движела со слично темпо, додека денес разликата е многу поизразена.
Во своето обраќање, премиерот посочи дека ваквите економски движења претставуваат охрабрување за Владата, која, како што истакна, продолжува да се соочува со предизвици во индустрискиот сектор. Особено внимание, според него, се посветува на состојбата во дел од рудниците каде е забележана намалена активност.
Мицкоски најави дека државата ќе преземе мерки за зајакнување на постојните капацитети и отворање нови рударски проекти, нагласувајќи дека оваа област ја смета за важен дел од идниот индустриски развој.
Тој остро реагираше на, како што ги нарече, обиди за попречување на ваквите планови, посочувајќи дека постојат структури во општеството кои се залагаат за затворање на рудниците, дури и на оние кои ги исполнуваат еколошките стандарди. Според него, таквите ставови не се во интерес на економската стабилност на државата.
Покрај рударството, премиерот ја истакна и потребата од стабилизирање на производството на електрична енергија, оценувајќи дека и таму веќе се забележуваат позитивни поместувања.
„Се движиме во добра насока, иако условите на глобално ниво остануваат сложени. Има простор за подобрување, но генерално, трендот е позитивен“, порача Мицкоски.
