Словачка најави дека може да го блокира новиот пакет санкции на Европската Унија против Русија доколку не добие гаранции за стабилни испораки на нафта преку нафтоводот „Дружба“.
Словачкиот министер за надворешни работи Јурај Бланар во четврток изјави дека Братислава ќе се спротивстави на усвојувањето на 20-от пакет санкции доколку цевководот не биде повторно ставен во функција. Според неговите тврдења, оштетувањата на „Дружба“ се поврзуваат со руските напади врз Украина на 27 јануари, додека поправките сè уште траат.
Словачка и Унгарија, кои во голема мера зависат од руската нафта, ја обвинуваат Украина дека го одложува санирањето на инфраструктурата.
„Доколку нафтоводот Дружба не биде оперативен кога ќе се гласа за новиот пакет санкции, ние нема да го поддржиме“, изјави Бланар, додавајќи дека целта е да се обезбеди континуирано снабдување со енергенси.
Тој нагласи и дека Словачка очекува реакција од украинскиот претседател Володимир Зеленски и Европската комисија за решавање на проблемот со нафтоводот.
Во меѓувреме, премиерот Роберт Фицо и унгарскиот премиер во заминување Виктор Орбан продолжуваат со критики кон Киев, обвинувајќи го за политички притисоци поврзани со „Дружба“.
И покрај тензиите околу енергетското прашање, од Братислава велат дека Словачка нема да ја блокира финансиската помош на ЕУ за Украина.
…
