Во скопската општина Ѓорче Петров денес официјално стартуваше проектот за проширување на капацитетите на основното училиште „Страшо Пинџур“, поддржан од Владата и Министерството за образование. Со оваа инвестиција, надлежните најавуваат подобри услови за настава и растеретување на постојните училишни простории.
Премиерот Христијан Мицкоски, кој присуствуваше на почетокот на активностите, истакна дека проектот е дел од поширока стратегија за унапредување на образовната инфраструктура во општината, при што најави дека во следниот период ќе започнат и нови слични проекти.
Тој упати благодарност до локалната самоуправа, општинските советници и пратениците од регионот, нагласувајќи дека нивната координација е клучна за реализација на ваквите инвестиции насочени кон подобар квалитет на живот за граѓаните.
„Како Влада остануваме посветени на поддршка на вакви проекти. Во наредните денови и недели ќе следат уште неколку нови иницијативи, кои ќе бидат дополнително претставени“, порача Мицкоски.
Премиерот додаде дека е неопходна силна поврзаност и усогласена работа меѓу локалните и централните институции за да се постигнат трајни резултати во образованието. Според најавите, во скоро време се очекува и претставување на нов инвестициски циклус кој треба да опфати повеќе сектори.
