Ирански воени бродови отвориле оган врз танкер и најмалку уште два трговски брода во Ормускиот Теснец, според информации објавени од британски извори и поморски служби.
Агенцијата за поморски и трговски операции на Обединетото Кралство соопшти дека инцидентот се случил на околу 35 километри североисточно од Оман, каде што два брода на Иранската револуционерна гарда пукале кон танкер без претходно радио предупредување. Според капетанот, нема повредени, а бродот останал безбеден.
Дополнително, најмалку два други трговски брода пријавиле дека биле цел на огнено дејство додека се обидувале да го преминат теснецот. Според извори запознаени со ситуацијата, еден товарен брод бил погоден од проектил, при што се оштетени дел од контејнерите.
Во меѓувреме, Иранската револуционерна гарда соопшти дека повторно воведува ограничувања за пловидба низ теснецот, обвинувајќи ги САД дека ја прекршуваат договорената рамка за прекин на огнот преку континуирана морска блокада.
Од друга страна, Централната команда на САД информираше дека продолжува со операцијата за контрола на бродскиот сообраќај кон и од иранските пристаништа. Во рамки на оваа мисија, воен брод патролира во Арапското Море, а дел од трговските бродови веќе ги следеле американските наредби и се вратиле назад.
Ситуацијата во регионот останува напната, со зголемен ризик за меѓународниот поморски сообраќај низ еден од најважните енергетски коридори во светот.
…
