На Пелистер се отвора нова уредена планинска патека која веќе го привлекува вниманието на љубителите на природата, рекреативците и велосипедистите, откако вработените од Националниот парк Пелистер, во соработка со Extreme Bike Team Bitola, изминатиот викенд работеа на нејзино целосно уредување и обележување.
Станува збор за атрактивна маршрута која започнува од Цапарска пресека и продолжува преку Горна скала и Лоша стена, сè до селото Цапари, нудејќи уникатно искуство низ еден од најживописните делови на паркот. Особено внимание привлекува видиковецот Лоша стена, кој се наоѓа на надморска височина од околу 1.220 метри, југоисточно од селото Цапари, и важи за еден од најлесно достапните природни панорамски пунктови на Пелистер. Со новото уредување, оваа локација сега станува уште попристапна за посетителите, кои ќе можат без поголеми напори да уживаат во погледите кон Пелагонија и околните планински масиви.
Паралелно со оваа патека, во тек е и уредување на уште еден значаен проект – кружна велосипедска и пешачка патека со вкупна должина од 16 километри. Оваа рута ќе започнува од Инфоцентарот на паркот, ќе минува низ Цапарска пресека, Цапарски вир, Ротинско езеро, како и преку Голема и Мала ливада, по што повторно ќе се враќа до почетната точка. Со тоа, посетителите ќе добијат комплетна кружна тура која комбинира повеќе природни атракции во една единствена рекреативна целина.
Овие активности се реализираат со поддршка од Министерството за животна средина и просторно планирање, како и Prespa Ohrid Nature Trust, и претставуваат дел од пошироките напори за развој на одржлив туризам и подобрување на инфраструктурата во Националниот парк Пелистер.
Со новите патеки, Пелистер добива уште една причина повеќе да биде на листата на омилени дестинации за љубителите на активен одмор, нудејќи комбинација од природа, рекреација и лесна достапност за сите генерации.
Линк до ФБ страна на Национален парк Пелистер
