НАТО авиони од неколку земји членки беа активирани вчера над Балтичкото Море, откако беа забележани руски стратешки бомбардери и борбени авиони во долготраен лет во регионот, јавува „Вашингтон пост“.
Француските „Рафал“, кои се стационирани во Литванија како дел од мисијата за воздушна полиција на Алијансата, први полетаа за да ја следат ситуацијата. Набрзо им се придружија и борбени авиони од Шведска, Финска, Полска, Данска и Романија, формирајќи заедничка НАТО-формација за надзор и пресретнување.
Според информациите од францускиот контингент, руската група се состоела од два стратешки бомбардери Ту-22М3 со долг дострел, придружувани од повеќе ловци Су-30 и Су-35 кои периодично ја обезбедувале нивната рута.
Од руското Министерство за одбрана, пак, тврдат дека летот бил однапред планирана мисија и се одвивал над меѓународни води на Балтичкото Море. Според нивното соопштение на Телеграм, летот траел повеќе од четири часа и се вклопува во редовните патролни активности на руската авијација над Арктикот, Северниот Атлантик, Тихиот Океан, како и над Балтичкото и Црното Море.
Москва дополнително наведува дека во одредени фази од патот, нивните авиони биле следени од странски борбени летала, нагласувајќи дека сите операции се спроведуваат во согласност со меѓународните правила за користење на воздушниот простор.
…
