Градоначалникот на Општина Прилеп, Дејан Проданоски, информираше дека учествувал на работна посета во Париз, каде што се реализирала размена на искуства во рамки на платформата за еколошки автобуси и одржлив возен парк.
Посетата била организирана од Транспортната заедница и ГИЗ – Германското друштво за меѓународна соработка, со поддршка на Регионалната организација за јавен превоз на Париз, Île-de-France Mobilités. Во рамки на програмата, како што посочи Проданоски, биле презентирани конкретни практики за воведување автобуси со нулта емисија, развој на инфраструктура за полнење, како и управување со енергетските ресурси во јавниот транспорт.
„Имавме можност директно да се запознаеме со начинот на кој Париз ја спроведува транзицијата кон одржлив јавен превоз. Овие искуства се од големо значење за нас и ќе помогнат во креирање на идни политики и проекти во Прилеп“, истакна Проданоски.
На средбите учествувале и претставници од Европската банка за обнова и развој и Европската инвестициска банка, кои ги презентирале можностите за финансиска поддршка на проекти поврзани со зелена мобилност и модернизација на транспортот.
Проданоски нагласи дека ваквите иницијативи придонесуваат за јакнење на институционалните капацитети и забрзување на процесите на декарбонизација, додавајќи дека се остварени и нови контакти со европски градови и институции, кои ќе бидат основа за идна соработка.
Тој потенцираше дека учеството на посетата било овозможено без користење средства од буџетот на општината.
„Како локална самоуправа, остануваме посветени на воведување современи, еколошки и одржливи решенија, со цел обезбедување поквалитетен јавен превоз и подобар квалитет на живот за граѓаните“, изјави Проданоски.
…
