Полицијата во Македонски Брод вчера попладне приведе 68-годишен жител на селото Дебреште, откако тој се обидел да избегне контрола и бил фатен како превезува бесправно исечено огревно дрво.
Инцидентот се случил на 23 април 2026 година околу 15 часот, на локалитетот познат како „Барбарас“. Таму полициски патроли од ОВР Македонски Брод извршувале редовна контрола на сообраќајот, кога забележале патничко возило „рено“ со скопски регистарски таблички, управувано од И.М. (68), во кое била натоварена дрвна маса за која постоеле сомнежи дека е нелегално сечена.
Кога службените лица му дале јасен знак да застане, возачот не ја почитувал наредбата и продолжил да се движи, при што, според информациите од полицијата, ја зголемил брзината и се упатил директно кон службеното возило. Во обид да ја спречат опасната ситуација, еден од полицајците испукал предупредувачки истрел во воздух.
Набргу потоа, возачот бил запрен и лишен од слобода, по што е спроведен во Полициската станица во Македонски Брод.
Од Министерството за внатрешни работи информираат дека по целосно документирање на случајот ќе биде поднесена соодветна кривична пријава против лицето.
…
