Европската унија би можела наскоро да направи значаен пресврт во политиката за горивата, со воведување нов тип бензин со повисока содржина на биоетано, таканаречениот Е20, кој би содржел 20 отсто обновливо гориво. Идејата, според германски медиуми, доаѓа во време на засилени енергетски тензии и притисоци на пазарот на горива, поттикнати од геополитичките случувања на Блискиот Исток.
Во Брисел веќе се разгледува можноста за промена на постојната европска регулатива за квалитет на горивата, која во моментов дозволува максимум до 10 проценти етанол во бензинот (E10). Новиот предлог би ја проширил таа граница и би овозможил поширока употреба на биогорива, со цел намалување на зависноста од фосилни извори и забрзување на процесот на декарбонизација на транспортниот сектор. Во документите и комуникацијата што циркулираат во институциите на ЕУ се нагласува и потребата да се процени компатибилноста на ваквото гориво со постојните автомобилски мотори, како и да се стимулираат инвестиции во понапредни генерации биогорива.
Поддржувачите на оваа насока тврдат дека биогоривата би можеле да станат клучен фактор во стабилизирање и потенцијално намалување на цените на горивата во иднина. Дел од европските експерти за енергетска и климатска политика сметаат дека преминот кон мешавини со повисок удел на биоетанол би можел да ја олесни транзицијата кон поодржлив транспорт, без нагли промени за возачите.
Паралелно со дебатата за бензинот, се засилува интересот и за други алтернативи во секторот за горива. Посебно внимание привлекува користењето на суровини како маслото од репка за производство на дизел-алтернативи. Според анализи на стручњаци цитирани во европските медиуми, ваквите биодизели покажуваат слични перформанси со класичниот дизел, иако со нешто пониска енергетска густина, разлика што делумно се компензира со нивната поголема густина и својства при согорување.
…
