Турските безбедносни служби спроведоа голема акција против шверцот во пограничниот регион кај градот Џизре, при што беше запленета значителна количина злато и готовина со вкупна вредност која надминува 590 милиони турски лири (околу 11,2 милиони евра).
Според информациите објавени од ТРТ Хабер, а преземени од соопштение на Генералната дирекција за безбедност на Турција, операцијата се одвивала вчера во областа на покраината Ширнак, недалеку од сириската граница. Полициските екипи запреле возило кое било означено како сомнително и извршиле детална контрола.
При претресот бил откриен и запленет поголем товар од скапоцени метали и пари. Меѓу нив се наоѓале 30 златни плочки, секоја тешка по еден килограм, потоа 85 грама злато поделено во 66 посебни делови, како и готовина во износ од 90.600 американски долари и 7.470 евра.
Од надлежните институции е потврдено дека во врска со случајот е покрената судска постапка против три лица осомничени за учество во шверцерската мрежа.
…
