Јавен обвинител од ОЈО ГОКК донел наредба за спроведување истрага против две лица, судски полицаец и доставувач од Основниот кривичен суд Скопје, поради сомнение за кривично дело „примање награда за противзаконито влијание“.
Според обвинителството, осомничените во периодот од август 2025 до април 2026 година примиле вкупно 500 евра и 60.000 денари од сведок, со ветување дека ќе посредуваат за обезбедување ослободителна пресуда во повисоките судски инстанци.
Случајот започнал кога сведокот, кој претходно бил осуден на една година затвор, преку посредник воспоставил контакт со доставувачот, а потоа и со судскиот полицаец. Тие, според истрагата, му се претставиле како лица со контакти и влијание врз судии и постапки.
Сведокот најпрво им предал 500 евра, а подоцна уште 60.000 денари, верувајќи дека ќе биде обезбедена поволна судска одлука. Сепак, Апелациониот суд ја потврдил првостепената пресуда, по што тој поднел вонреден правен лек.
По предлог на обвинителството, судот донел одлука за 30-дневен притвор за судскиот полицаец, додека за доставувачот е определен куќен притвор. Обвинителството најави жалба на одлуката за поблага мерка кон второосомничениот.
…
