Поранешниот претседател на Европската комисија и поранешен премиер на Италија, Романо Проди, предупреди дека евентуално доаѓање на АфД на власт во Германија би можело сериозно да ја загрози иднината на Европската Унија.
Во гостување на „Радио 24“, Проди говорел за политичките предизвици со кои се соочува Европа, при што особено внимание посветил на политичката ситуација во Германија и растот на десничарската АфД.
Според него, евентуална изборна победа на АфД во најголемата европска економија би можела да има сериозни последици врз функционирањето на Унијата.
„Ако АфД победи на изборите во Германија, со Европската Унија е завршено“, изјавил Проди, оценувајќи дека таков исход би можел дополнително да го отежне носењето и спроведувањето на заедничките одлуки во ЕУ.
Тој посочил дека Унијата и во моментов се соочува со тешкотии при спроведувањето на сопствените политики, а политичка промена во Германија би можела дополнително да ја продлабочи нестабилноста.
Ставовите на Проди доаѓаат во период кога политичките промени во најголемите земји членки на ЕУ се следат со внимание, особено поради нивното влијание врз идниот курс на Унијата.
Германија има значајна улога и во процесот на проширување на ЕУ, што ги прави политичките случувања во земјата релевантни и за земјите кандидатки, меѓу кои е и Македонија.
…
