Градоначалникот на Битола, Тони Коњановски, истакна дека кугланата во градот нуди едни од најдобрите услови за куглање во државата, по одржаното поединечно првенство во сениорска конкуренција.
Тој посочи дека натпреварувањето се одвивало во повеќе фази, при што квалификациите, осминафиналето и четвртфиналето се играле во Скопје, додека полуфиналето и финалето биле организирани во битолската куглана.
Во машка конкуренција учествувале двајца куглари од клубот „Макпетрол“, по еден од „Вардар“ и „ГТЦ“, додека во женска конкуренција настапиле три кугларки од „ГТЦ“ и една од битолскиот клуб „Пелистер“.
Коњановски информира дека заедно со директорот на ЈП „Комуналец“, Горан Степановски, ги доделиле наградите на најуспешните, а претседателот на федерацијата, Дарко Димитровски, упатил пофалби за вложувањата на Општина Битола во развојот на куглањето.
„Она што Општина Битола го прави за куглањето, ниту една друга општина не го има направено. Ќе продолжиме и понатаму да даваме поддршка и да инвестираме во овој спорт“, изјави Коњановски.
Тој додаде дека токму поради високите стандарди и услови, битолската куглана ќе биде избрана како база за подготовки на машката и женската сениорска репрезентација за претстојното Светско првенство во Австрија.
