Грант во вредност од околу половина милион евра денеска ќе биде доделен за реализација на проектот „Паметна обука во преработката на производи од млеко и месо“, кој го предводат Земјоделскиот факултет при Универзитетот „Гоце Делчев“ во Штип и средното општинско училиште „Кочо Рацин“ од Свети Николе, во партнерство со шест домашни претпријатија.
Средствата се обезбедуваат преку Регионалниот фонд за предизвици (РЦФ), а свеченото доделување ќе се одржи во рамки на четвртиот национален настан во Македонија, организиран во соработка со Стопанската комора, како дел од пошироката агенда за зајакнување на конкурентноста на бизнисите во Западен Балкан и нивно приближување до единствениот пазар на Европската Унија.
Фокусот на програмата е поврзување на образованието со реалниот сектор и унапредување на стручните вештини. Настанот ќе го отворат и ќе се обратат министерката за образование и наука Весна Јаневска, претседателот на Стопанската комора Бранко Азески, германската амбасадорка Петра Дрекслер, како и претставници од Швајцарија, германската развојна банка и Регионалниот инвестициски форум на Западен Балкан.
Со добиениот грант, вреден 495.350 евра, ќе се инвестира во изградба и модерно опремување на нов Центар за обука за преработка на млеко и месо. Покрај инфраструктурниот дел, проектот предвидува и развој на наставни програми и едукативни материјали, со цел да се поддржат две професионални квалификации: млекопреработувач и преработувач на месо и месни производи.
Според податоците од Министерството за образование и наука, на четвртиот повик на РЦФ пристигнале вкупно 187 апликации од шесте земји од регионот, од кои 14 од Северна Македонија. По изборот на комисијата, токму овој проект е оценет како најсоодветен за финансирање во рамки на расположливите средства.
Овој циклус на поддршка претставува дел од поширока регионална иницијатива која досега опфати 17 проекти и вклучи 91 партнерска компанија од земјата, со вкупна финансиска поддршка од над 7,6 милиони евра, насочени кон развој на дуалното образование и поблиска соработка меѓу училиштата и индустријата.
…
