Неверојатен натпревар со седум голови го одбележа полуфиналето во Париз, каде што фудбалската публика уживаше во вистински спектакл. Натпреварот започна со гол на Хари Кејн од пенал во 17. минута, но само седум минути подоцна Квича Кварацхелија израмни. Жоао Невеш донесе ново водство, а Михаел Олисе повторно ја врати неизвесноста. Во судиското продолжение од првото полувреме, Осман Дембеле од пенал им донесе предност на домаќините.
Во второто полувреме, Кварацхелија со мајсторски погодок во 56. минута зголеми на 4:2, а само две минути подоцна Дембеле погоди за убедливи 5:2. До крајот, Баерн успеа да намали преку Дајо Упамекано и Луис Дијаз, со што остана надеж за реваншот.
Грузискиот репрезентативец Кварацхелија беше апсолутен херој на вечерта, покажувајќи дека во моментов е меѓу најдобрите фудбалери во светот. Неговата игра особено го воодушеви легендарниот Вејн Руни, кој како стручен коментатор не го криеше своето восхитување.
„Слушајте ме добро, мораме да зборуваме за ова момче. Тоа што го покажа денес не е само талент, туку карактер. Едно е да постигнеш два гола во полуфинале од Лигата на шампионите, но начинот на кој го направи тоа е нешто сосема друго. Ги повикува дефанзивците на дуел, а потоа ги остава зад себе. Неговата ‘стоп-старт’ игра е кошмар за секој дефанзивец. Директен е, непредвидлив и има самодоверба затоа што знае дека е најдобар на теренот“, изјави Руни.
Тој додаде дека токму ваков профил на играч му недостасува на Манчестер Јунајтед.
„Кога го гледам, веднаш помислувам на Манчестер Јунајтед. Имаме квалитет, но ни недостасува тој елемент на хаос што го носи тој. Тој создава нешто од ништо. Тој е играч што добра екипа ја претвора во тим што доминира. Да бев во управата на Јунајтед, веднаш би го земал телефонот – ваков играч во нивниот дрес е сон“, порача Руни.
…
