Словенечката политичка сцена влезе во нов бран превирања откако парламентот усвои измени на Законот за влада со кои идната извршна власт ќе биде значително „ослабена“ и редизајнирана. Со 49 гласа „за“ и само 4 „против“, пратениците дадоа зелено светло за намалување на бројот на министерства од досегашните 19 на 14, потег што веднаш ја префрли дебатата од административна во отворено политичка.
Иницијативата, поднесена од СДС на Јанез Јанша, беше претставена како обид за поголема ефикасност и рационализација на државниот апарат. Планот предвидува спојување на ресори и укинување на одделни министерства, со образложение дека идната влада треба да функционира со помалку бирократија и пониски трошоци. Иако измените формално ќе стапат во сила дури по формирањето нов кабинет, нивното усвојување веќе го пренареди политичкиот терен.
Поддршката што ја доби предлогот од СДС, НСи, СЛС, „Фокус“, „Демократи“ и „Ресница“ се толкува како сигнал дека се отвора простор за нови коалициски комбинации. Со ваквиот распоред на гласови, десниот политички блок се приближува до прагот потребен за формирање парламентарно мнозинство во Собранието од 90 пратеници, што дополнително ја засилува неизвесноста околу идниот владин состав.
Во меѓувреме, претседателката Наташа Пирц Мусар одби да додели мандат за состав на влада, оценувајќи дека ниту една политичка опција во моментов не располага со стабилна поддршка. Таа ја префрли одговорноста врз парламентот, каде сега тежиштето на процесот за формирање влада е целосно во рацете на пратениците.
Додека политичките преговори се интензивираат, техничкиот премиер Роберт Голоб призна дека не успеал да обезбеди доволно поддршка за продолжување на својот мандат, и покрај тоа што неговото движење „Слобода“ освои најголем број мандати на изборите.
…
