По натпреварот во кој Ал-Наср славеше со 2-0 над Ал-Ахли, Кристијано Роналдо повторно се најде во центарот на вниманието, откако со својот 970-ти погодок во кариерата испрати порака која многумина ја протолкуваа како најава за приближување кон крајот на неговата фудбалска приказна.
Португалскиот ас, кој има 41 година, зборуваше отворено за својата сегашност и иднина, нагласувајќи дека и покрај долгата и успешна кариера, љубовта кон играта кај него сè уште не е намалена. Сепак, тој призна дека реалноста на годините полека наметнува ново поглавје во неговиот професионален пат.
„Крајот е сè поблиску, затоа треба да уживаме во секој натпревар. Не играм само за оваа генерација, туку и за сите што беа пред нас и за оние што допрва ќе дојдат“, порача Роналдо, петкратниот добитник на „Златната топка“.
Во своето обраќање, тој се осврна и на тимските цели, истакнувајќи дека главен фокус на Ал-Наср останува освојувањето на шампионската титула во Саудиска Арабија. Дополнително, упати и апел до соиграчите да ја намалат јавната критика кон судиите на социјалните мрежи, нагласувајќи дека таквиот пристап е неопходен доколку лигата сака да достигне повисоко, европско ниво на професионализам.
…
