Агенцијата за храна и ветеринарство подготви сериозни измени во законската рамка за заштита на животните, со кои се предвидуваат значително построги правила за сопствениците и драстично повисоки казни за прекршителите.
Предлог-законот, изработен во координација со повеќе институции и здруженија, има за цел конечно да стави крај на злоупотребите и негрижата, но засега останува нејасно дали формално е влезен во процедура во Министерството за земјоделство.
Според предложените измени, непочитувањето на основните правила за чување и движење на кучиња ќе се санкционира со казни од околу 400 евра, додека за потешки прекршоци како сурово постапување, нанесување болка или убивање животни, глобите ќе достигнуваат и до 5.000 евра. Најстрогата мерка, која веќе предизвикува силни реакции во јавноста, е воведувањето доживотна забрана за поседување миленици за лица кои ги напуштиле своите животни.
Законот оди чекор понатаму и во однос на условите за чување: се забранува постојано врзување или држење на кучиња во затворен простор без секојдневно движење, а се укинуваат и практиките на ритуално усмртување на животни. Дополнително, за првпат се воведува задолжителна стерилизација на домашни кучиња, како и обврска секое легло да биде пријавено кај ветеринар, со ограничување на најмногу едно легло годишно по животно.
Во делот на справување со бездомните животни, се предвидува отворање центри за згрижување, можност за привремено вдомување и воспоставување регистар за пансиони, одгледувачници и продавници за миленици. Надзорот ќе биде засилен, со директно вклучување на полицијата и локалните инспекторати, што значи дека контролите ќе бидат почести и построги.
Иако од Агенцијата тврдат дека предлогот е доставен до ресорното министерство уште на почетокот на април, од Министерството засега нема официјална потврда. Во меѓувреме, најавени се јавни презентации низ државата, преку кои граѓаните ќе можат директно да се вклучат во процесот и да дадат свои забелешки пред конечното усвојување на законот.
Доколку овие измени бидат изгласани, Македонија би направила значаен чекор кон европските стандарди во заштитата на животните, но и кон воведување ред и одговорност таму каде што со години владееше хаос.
