Градоначалник од југозападна Германија предупредува на сериозни последици од најавеното повлекување на американските сили, оценувајќи дека ваквиот потег може да предизвика економски шок со долгорочни последици за локалната заедница.
Станува збор за Ралф Хехлер, градоначалник на Рамштајн-Мизенбах, каде се наоѓа една од најважните американски воздухопловни бази во Европа. Тој изјави дека повлекувањето на околу 5.000 американски војници, заедно со нивните семејства, може да значи заминување на до 12.000 луѓе од регионот.
Според него, ова би претставувало тежок удар за локалната економија, која во голема мера зависи од присуството на американските сили. Само во оваа општина живеат околу 8.000 Американци, а нивното економско влијание се проценува на повеќе од две милијарди долари годишно.
Хехлер предупредува дека искуствата од други градови, од каде американските сили се повлекле по Студената војна, покажуваат дека последиците се долготрајни. „Откако ќе исчезне економската моќ, таа обично никогаш повеќе не се враќа“, нагласи тој.
Иако Вашингтон сè уште не прецизирал кои бази ќе бидат опфатени со повлекувањето, стравувањата растат, особено ако меѓу нив се најде и стратешката база Рамштајн. Во моментов, во Европа се стационирани околу 86.000 американски војници, од кои близу 39.000 се во Германија, што ја прави земјата клучен воен партнер на САД на континентот.
