Турскиот претседател, Реџеп Таип Ердоган остро ја критикуваше Европската унија, обвинувајќи ја дека со години применува двојни стандарди кон Турција и свесно го одложува нејзиното приклучување кон европското семејство.
Ердоган истакна дека Брисел предолго ја остава Анкара „пред затворени врати“, додека процесот на приближување, кој започнал уште во 1959 година, останува заглавен во политички и институционални пречки.
Според него, суштинското прашање повеќе не е што прави Турција, туку каква визија за сопствената иднина има самата Европска унија. Ердоган оцени дека без Турција како рамноправна членка, Унијата не може да се смета за вистински глобален актер, предупредувајќи на, како што рече, сè уште присутна „стратешка кратковидност“ во европските центри на одлучување.
Тој се осврна и на долгогодишните забелешки од европска страна, посочувајќи дека Турција постојано се соочувала со различни видови отпори: од критики за демократските процеси, преку економски резерви, па сè до, како што нагласи, културни и верски предрасуди.
„Нашата демократија ја ставаа под прашалник, економијата ја прикажуваа како ризик, а верата како причина за исклучување“, порача тој, сумирајќи го, според неговото толкување, односот на дел од европските институции.
И покрај ваквите пораки, Анкара, како што истакна Ердоган, останува посветена на европската перспектива, но бара од ЕУ да се ослободи од историските и политичките предрасуди и да гради однос базиран на еднаквост и меѓусебно почитување.
Во завршницата на неговото обраќање, турскиот лидер испрати и поширока геополитичка порака, нагласувајќи дека светскиот поредок веќе не е еднополарен и дека Турција активно се позиционира како еден од клучните играчи во новите глобални односи.
„Не сме држава што се повикува само кога некому му треба. И нема да бидеме такви“, порача Ердоган, заокружувајќи ја својата порака со јасен став за улогата на Турција во иднината.
…
