Пред Велигденските празници, инспекциските служби на Агенцијата за храна и ветеринарство, во координација со Царинската управа, пресекоа обид за пуштање на голема количина необележани јајца на домашниот пазар, кои потекнувале од Србија и требало да завршат како „македонски производ“.
Станува збор за две одвоени пратки во кои биле откриени вкупно над половина милион јајца, околу 270 илјади во едната и 302.400 во другата. Според наодите, јајцата биле увезени без соодветно означување, со намера дополнително да се етикетираат и да се прикажат како домашно производство, што би можело да влијае врз фер-конкурентноста и да ги доведе во заблуда потрошувачите.
Откриената пратка веднаш била ставена под контрола, а целата количина, околу 40 тони, била безбедно уништена на депонијата „Дрисла“, како мерка за спречување на било каков ризик по пазарот и потрошувачите.
Од Агенцијата за храна за „Слободен печат“ информираат дека на операторот кој ја внел пратката, а е регистриран кај нив, му е изречена парична казна во износ од 1.400 евра. Дополнително, против истиот оператор не е поднесена кривична пријава, и покрај тоа што поседува и сопствено производство на јајца и активно учествува на пазарот.
Институцијата нагласува дека во периодот пред празниците се спроведуваат засилени инспекциски контроли, како на увозот, така и на домашното производство на јајца, со цел навремено да се спречат злоупотреби и пласирање на небезбедна или погрешно декларирана храна.
Од АХВ дополнително тврдат дека во конкретниот случај не биле регистрирани никакви надворешни притисоци или влијанија врз нивното постапување, нагласувајќи дека интервенцијата била навремена и единствена од ваков тип кај наведениот оператор.
…
