Нови тензии избувнаа меѓу САД и Иран откако американските сили извршиле напади врз ирански пристаништа и острови во близина на Ормутскиот теснец, а Техеран соопшти дека веднаш возвратил со контранапади врз американски воени бродови.
Според соопштението на иранската централна команда Хатам ал-Анбија, Вашингтон го прекршил прекинот на огнот од 7 април со напад врз ирански танкер што пловел од крајбрежните води кај Џаск кон Ормутскиот теснец, како и врз уште еден брод во близина на пристаништето Фуџаира во Обединетите Арапски Емирати.
Иранските власти тврдат дека американските сили, во координација со неколку земји од регионот, извршиле и воздушни удари врз цивилни подрачја долж брегот, вклучително и во близина на пристаништата Хомер и Сирик, како и на островот Кешм.
Во одговор, иранските вооружени сили соопштија дека нападнале американски воени бродови во источниот дел на Ормутскиот теснец и јужно од пристаништето Чабахар, при што, според нивните тврдења, биле нанесени „значителни оштетувања“.
Паралелно со тоа, медиуми јавија за силни експлозии во близина на островот Кешм и пристанишниот град Бандар Абас, додека иранската противвоздушна одбрана била активирана и во Техеран. Постојат и информации дека Иранската револуционерна гарда можеби нападнала три американски разорувачи во Ормутскиот теснец.
Американски претставник за „Фокс њуз“ потврдил дека САД извршиле напади врз Кешм и Бандар Абас, но нагласил дека операцијата не претставува формално продолжување на војната ниту крај на прекинот на огнот.
Во меѓувреме, американската Централна команда – ЦЕНТКОМ соопшти дека биле неутрализирани „сите дојдовни закани“, а погодени биле ирански воени објекти поврзани со ракетни и беспилотни напади, командни центри и разузнавачки капацитети.
Според американските информации, нападот бил изведен откако Иран лансирал ракети, беспилотни летала и мали вооружени чамци кон три американски разорувачи кои минувале низ Ормутскиот теснец.
Ескалацијата следува само два дена по иранскиот ракетен напад врз пристаништето Фуџаира во Обединетите Арапски Емирати, кога, според извештаите, биле испукани 15 балистички и крстосувачки ракети, што предизвикало сериозна загриженост кај земјите од Заливот.
