Глобалната економија повторно се наоѓа под силен притисок, откако ескалацијата на конфликтот меѓу САД, Израел и Иран внесе нов бран нестабилност на енергетските пазари и ја зголеми неизвесноста кај потрошувачите и бизнисите ширум светот. Додека инфлацијата и високите трошоци ја стегаат секојдневната економија, некои од најмоќните корпорации во светот бележат историски резултати.
Најголем потрес се чувствува во секторот за енергија, каде што геополитичките тензии и нарушувањата на клучните транспортни рути, меѓу кои и Ормутскиот Теснец, преку кој поминува значителен дел од глобалната нафта и гас, доведоа до нагло зголемување на цените на енергенсите. Овој скок директно се одразува на пазарите, но за нафтените гиганти претставува период на рекордна заработка.
Британскиот BP во првите месеци од 2026 година го удвои својот профит, достигнувајќи 3,2 милијарди долари. Слична динамика се забележува и кај „Шел“, која пријави добивка од 6,92 милијарди долари, додека францускиот TotalEnergies оствари раст од речиси 30 проценти и се искачи на 5,4 милијарди долари профит. Американските ExxonMobil и Chevron исто така ги надминаа пазарните очекувања, поттикнати од зголемената нестабилност во снабдувањето и високите цени на суровата нафта.
Силен раст бележи и финансискиот сектор. Банкарските гиганти од Волстрит извлекуваат значителна корист од зголемената пазарна активност и тргувањето во услови на неизвесност. JP Morgan во првиот квартал пријави 11,6 милијарди долари приходи, додека шесте најголеми американски банки заедно генерирале околу 48 милијарди долари. Аналитичарите посочуваат дека нестабилните пазари и стравот од понатамошна ескалација значително ја зголемиле активноста кај инвеститорите.
Одбранбениот сектор исто така влегува во период на силна експанзија. Компании како BAE Systems, Lockheed Martin, Boeing и Northrop Grumman пријавуваат зголемени нарачки, поттикнати од растечките буџети за одбрана во САД и Европа, како и од потребата за обновување на воените резерви.
И додека традиционалните индустрии профитираат од кризата, таа истовремено го забрзува и преминот кон почисти извори на енергија. Високите цени на горивата ја зголемуваат побарувачката за соларни системи, топлински пумпи и електрични возила. Компании како NextEra Energy и Vestas веќе бележат раст на приходите, а во делови од Европа, вклучително и Велика Британија, продажбата на соларни панели е зголемена за околу 50 проценти од почетокот на кризата.
…
