Македонската адвокатка Катерина Котеска-Стисниовска, која е специјализирана за семејно право и семејно насилство, објави емотивна и потресна порака на социјалните мрежи по трагичното убиство на Македонката Милена во Пјаченца.
Случајот ја потресе македонската јавност откако беше објавено дека Македонецот Хако Витанов ја убил својата сопруга Милена, а потоа сам се пријавил во полиција и го признал злосторството.
Во својата објава, адвокатката открива дека Милена пред неколку месеци се обидела да стапи во контакт со неа, барајќи помош, но никогаш не успеала да го направи последниот чекор.
„Срцето ми се скрши… Жртвата, Македонка во Пјаченца, Италија ме контактирала. Ми пиша и ги бришеше пораките, а јас ѝ оставив телефон да ми се јави кога и да може“, напиша Котеска-Стисниовска.
Според неа, Милена на 5 октомври 2025 година ѝ напишала дека ќе ја побара „во прва можна прилика“, но тој повик никогаш не се случил.
„Зошто драга Милена, не одлучи да избегаш, да го оставиш, да се спасиш???“, напиша адвокатката во емотивната порака.
Таа открива и дека Милена долго време носела длабока болка по смртта на својот син, кој загинал во сообраќајна несреќа, по што, како што наведува, „едноставно изгубила желба да се бори“.
Во објавата, адвокатката испрати силен апел до сите жени кои трпат семејно насилство да побараат помош и да не молчат.
„Но драги жени кои трпите насилство, животот е еден, а вашите деца претрпуваат трауми кои се ненадоместиви. Насилството ви го уништува здравјето, а траумите на децата нивната иднина“, порача таа.
Котеска-Стисниовска нагласи дека нема оправдување за семејното насилство и ги повика жртвите да се охрабрат и да побараат спас навреме.
„Апелирам до сите жртви кои во моментот трпат насилство, да се охрабрат, да тргнат да се спасат. Нема оправдување за семејното насилство! Сите против семејното насилство“, стои во нејзината објава.
Случајот со Милена повторно ја отвори темата за семејното насилство и стравот со кој се соочуваат многу жени кои живеат во токсични и опасни односи, а јавноста на социјалните мрежи масовно ја споделува пораката на адвокатката како апел за навремена реакција и поддршка за жртвите.
