Министерот за здравство Азир Алиу по повод одбележувањето на националната и европската недела на медицински сестри и акушерки ја истакна клучната улога на медицинските сестри, техничари и акушерки во функционирањето на здравствениот систем.
На свечената академија, организирана од ЗМСТАМ, Алиу порача дека тие претставуваат јадро на здравството, учествувајќи во сите сегменти – од превенција и дијагностика, до рехабилитација и поддршка на пациентите и нивните семејства.
„Министерството за здравство е посветено на зајакнување на човечките ресурси во јавните здравствени установи, при што се реализирани над 1.250 вработувања во јавноздравствениот сектор, од кои значителен дел се медицински сестри“, истакна Алиу.
Тој потсети дека минатиот месец е потпишан колективен договор со Синдикатот на вработените во Клиничкиот центар и Самостојниот синдикат за здравство, фармација и социјална заштита, со кој е предвидено покачување на платите од 7 проценти со мартовската плата, како и утврдена динамика за понатамошен раст на платите.
Министерот нагласи дека Министерството останува посветено на континуирана надградба на здравствената инфраструктура, унапредување на статусот на медицинските сестри и акушерки, како и поддршка на нивното образование и професионален развој.
…
