ЈКП „Комуналец“ – Прилеп повторно спроведува акција за чистење на дивата депонија на патот кон Вештачкото езеро, каде денеска може да се забележат големи количини градежен шут, стар мебел, домашни апарати, пластика и мешан комунален отпад.
Иако локацијата беше целосно исчистена на 15 ноември 2025 година во рамки на еко акција организирана од Општина Прилеп и јавното претпријатие, само по неколку месеци состојбата повторно е алармантна. Граѓаните секојдневно реагираат до „Комуналец“ поради несовесното фрлање отпад, а депонијата повторно претставува сериозен проблем за животната средина.
Директорот на ЈКП „Комуналец“ – Прилеп, Љубиша Јовановски, апелираше до граѓаните и компаниите да покажат поголема одговорност и свест за правилното управување со отпадот.
„За оваа година општината има издвоено 4.200.000 денари исклучиво за чистење диви депонии. Верувам дека граѓаните, а особено градежните фирми, ќе покажат разбирање и отпадот кој не припаѓа во категоријата комунален ќе го одложуваат на депонијата во Алинци, каде влезот за граѓаните е бесплатен. Неразбирливо е во 21 век, кога секојдневно се предупредува за последиците од неправилното третирање на отпадот, ние и понатаму да се однесуваме неодговорно“, истакна Јовановски.
Од претпријатието потсетуваат дека граѓаните можат да изнајмат контејнер од 5 метри кубни по цена од 1.360 денари или трактор за транспорт на отпад по цена од 620 денари.
За габаритен отпад, ЈКП „Комуналец“ има воведено и бесплатна линија секој четврток и петок, со претходно пријавување на телефонскиот број 048/428-992.
Од претпријатието уште еднаш апелираат секој отпад да се одлага на соодветно место, со цел зачувување на животната средина и почиста околина за сите граѓани.
„Чисто е убаво!“, порачуваат од „Комуналец“ – Прилеп.
…
