Поранешниот претседател на Светска банка, Дејвид Малпас, упати остро предупредување до Пекинг, оценувајќи дека Кина треба да ја намали практиката на масовно складирање храна и ѓубрива, со цел да се ублажат глобалните притисоци врз снабдувањето кои, според него, се влошени од актуелните геополитички тензии поврзани со конфликтот со Иран.
Во изјава за Би-Би-Си, Малпас истакна дека Кина располага со најголемите светски резерви на овие стратешки суровини, што, како што рече, има значајно влијание врз пазарната рамнотежа во време кога многу земји се соочуваат со недостиг. Тој посочи дека глобалниот систем за снабдување со ѓубрива е под силен притисок, особено во пресрет на пролетната сеидба, додека дополнителни компликации создава и нарушувањето на поморските рути, вклучително и ситуацијата во Ормутскиот теснец.
Малпас нагласи дека од март Кина има прекинато извоз на повеќе видови ѓубрива, повикувајќи се на потребата од заштита на домашните резерви. Овие мерки, според него, се надоврзуваат на ограничувањата кои постепено се воведуваат уште од 2021 година. Тој потсети дека минатата година Кина учествувала со околу една четвртина во глобалното производство на ѓубрива, додека извозот надминал 13 милијарди долари.
Поранешниот прв човек на Светска банка, кој ја водеше институцијата од 2019 до 2023 година, се осврна и на поширокиот економски контекст, критикувајќи ја позицијата на Пекинг како „земја во развој“. Според него, таквата дефиниција станува сè помалку одржлива, со оглед на тоа што Кина денес е втората најголема светска економија и има значајна економска моќ во повеќе сектори.
Во однос на глобалната трговска динамика и безбедноста на поморските рути, Малпас изрази надеж дека Кина ќе има активна улога во деблокирањето на ситуацијата во Ормутскиот теснец, нагласувајќи дека слободното движење на бродовите е директно поврзано со нејзините економски интереси. Тој потсети дека кинеската економија значително профитира од глобалната трговија преку сопственост и управување со голем дел од бродските и контејнерските капацитети.
На крајот, осврнувајќи се на економските трендови во САД пред објавувањето на новите податоци за инфлацијата, Малпас предупреди на можен раст на цените. Според него, американските потрошувачи би можеле да се соочат со поскапувања кај повеќе категории производи, како дел од поширок инфлаторен притисок што сè уште не е целосно стабилизиран.
…
