Во скопската населба Козле синоќа беше забележано и заловено непознато животно кое подоцна е пренесено во карантинскиот дел на Скопје ЗОО, каде што ќе остане под надзор додека не се спроведат детални анализи од страна на Агенцијата за храна и ветеринарство (АХВ).
Според првичните проценки на стручните лица од Зоолошката градина, изгледот и однесувањето на животното упатуваат на силна сличност со волк, иако не се исклучува можноста дека станува збор за мешавина со куче, односно мелез со волчји карактеристики.
Од ЗОО Скопје информираат дека животното било затекнато во видно исплашена состојба, но неагресивно, во близина на станбени згради во Козле, при што околу вратот имало синџир, детал што отвора сомнежи дека претходно било чувано во домашни услови.
Во меѓувреме, од институцијата повторно апелираат дека држењето диви животни како домашни миленици е строго забрането и претставува ризик и за животните и за луѓето, нагласувајќи дека случајот дополнително ќе се расчистува по завршување на ветеринарните испитувања.
…
