Од 13 до 17 мај Градскиот парк во Скопје ќе се претвори во центар на винска и гастрономска понуда, со јубилејното 15. издание на фестивалот „Виноскоп 2026“, кое ќе се одржува кај „Школка“.
Настанот, под покровителство на Град Скопје, повторно ја става во фокус домашната винска сцена, носејќи дегустации од голем број македонски винарии и производители, но и богата придружна содржина за посетителите.
Покрај винските штандови, фестивалот ќе понуди разновидна гастрономска понуда и внимателно курирана музичко-забавна програма, во која се најавени настапи на домашни изведувачи, бендови и диџеи. Оваа година посебен акцент се става и на тематските вечери, како и на дневните активности кои ќе се одвиваат под концептот „Блуз и вино“.
Организацијата предвидува различен ритам на старт на програмата во текот на деновите: во среда и четврток содржините започнуваат од 18 часот, во петок од 17 часот, додека за време на викендот фестивалската атмосфера ќе се раздвижи уште од пладне.
Како што истакна градоначалникот Орце Ѓорѓиевски, преку „Виноскоп“ градот продолжува да ја поттикнува домашната винска индустрија и да го развива винскиот туризам како важен дел од културната и туристичката понуда на Скопје.
…
