Извор: Скопје1.мк
Инцидентот на падините на Водно, во кој се најдоа малолетен велосипедист и рекреативен планинар, доби и институционална разврска откако Министерството за внатрешни работи потврди дека случајот завршил со повик во полициска станица и писмено предупредување.
Од МВР информираат дека малолетното лице, кое управувало велосипед по патеките на Водно, било повикано во Полициската станица Карпош заедно со својот родител. По службен разговор, на детето му било изречено писмено предупредување поради возење велосипед на локација каде што се движат голем број пешаци и рекреативци.
Сè започна по објава на видео на социјалните мрежи, снимено и споделено од самиот велосипедист, кое брзо предизвика лавина реакции во јавноста. На снимката се гледа напната расправија меѓу него и планинар кој реагира на неговото движење по пешачката патека, укажувајќи дека таквото возење може да ја загрози безбедноста на луѓето, особено на децата кои се движат низ тој дел од планината.
Во еден момент од вербалниот судир, ситуацијата ескалира до точка кога на терен интервенира и полицијата.
Од друга страна, велосипедистот во расправијата тврдел дека не постои јасна сигнализација за забрана за велосипеди на конкретната делница и дека се движел со контролирана и внимателна брзина, без намера да загрози никого.
Планинарот, пак, останал на ставот дека патеката е наменета исклучиво за пешаци и дека присуството на велосипеди таму претставува реален ризик. Во своето образложение тој посочил и личен мотив за загриженост, наведувајќи дека член на неговото семејство претходно бил сериозно повреден во слична ситуација.
Кристијан Крстевски, планинарот кој реагираше на лице место, подоцна во емисијата „Претрес“ објасни дека неговата остра реакција произлегла од страв за безбедноста на најранливите учесници на патеката, особено децата.
Во меѓувреме, останува и напомена дека велосипедска патека постои само до Средно Водно, додека делницата од Средно Водно кон Милениумскиот крст не е официјално уредена како велосипедска траса.
…
