Во скопската населба Козле денеска бил забележан волк кој бил чуван како домашен миленик, а на себе имал синџир и каивче. По пријава од загрижени граѓани, на терен интервенирале полициски службеници од МВР, по што пристигнале и екипи од ЗОО Скопје и претставници на Град Скопје.
Волкот бил успешно и безбедно заловен, а потоа транспортиран во Зоолошката градина во Скопје, каде што ќе биде згрижен и ќе му бидат обезбедени соодветни услови и грижа. Од ЗОО Скопје информираат дека животното во наредниот период ќе биде сместено во карантин и под постојан здравствен надзор од стручни лица.
Од институциите посочуваат дека ситуацијата завршила без последици бидејќи станувало збор за питомо и мирно животно, но повторно апелираат дека чувањето диви животни како домашни миленици е забрането и опасно.
„Волците не се миленици и не смеат да се чуваат во заробеништво и несоодветни услови. Станува збор за диви животни кои имаат природни потреби, инстинкти и однесување“, наведуваат надлежните.
Воедно, упатен е апел до граѓаните доколку забележат нелегално чување диви животни, случаите веднаш да ги пријават до надлежните институции.
Од ЗОО Скопје изразија благодарност до МВР, Град Скопје, како и до вработените Сашо Панчев и Тина Мицковска и сите вклучени служби за брзата и координирана интервенција.
…
