Советот на Општина Битола на вчерашната седница усвои две иницијативи предложени од опозициски советници, а поддржани од мнозинството, во редок пример на политичко обединување околу прашања од интерес за граѓаните.
Со 27 гласа „за“, советниците од ВМРО-ДПМНЕ и коалицијата, СДСМ, ПОИНАКУ, ЛДП, ЗНАМ, ГРИН и ДУИ ги прифатија иницијативите за подобрување на условите за децата со посебни потреби и за изградба на „Македонско-американски парк“ кај „Авионите“ во Битола. Против гласаа двајцата советници од Левица.
Првата иницијатива ја предложи советникот од ЛДП, Димитар Кузмановски, а се однесува на обезбедување подобра поддршка за децата со посебни потреби и нивните семејства. Предлогот предвидува ваучери за дефектолошки, логопедски и психолошки третмани, еднократна финансиска помош, бесплатен паркинг и автобуски превоз за родители на деца со аутизам, како и подготовка на локална програма со финансиска рамка за поддршка.
„Еден час кај логопед или дефектолог денес чини околу 1.000 денари и тоа станува голем товар за семејствата. Потребно е системско решение, а не ад хок помош“, рече Кузмановски, додавајќи дека иницијативата ќе се разработува заедно со советничката од ВМРО-ДПМНЕ, Марина Крстиќ.
Втората иницијатива ја предложи советничката од СДСМ, Софија Ристевска-Петрушевска, по идеја на младиот Јане Велкоски. Таа предвидува изработка на проект за „Македонско-американски парк на пријателството“ кај „Авионите“ во Битола.
Според предлогот, просторот треба да биде уреден со македонско и американско знаме, хортикултурно уредување, урбана опрема, осветлување и симболично обележје посветено на македонско-американското пријателство.
„Овој парк ќе биде нов туристички и рекреативен простор и ќе испрати позитивна порака за меѓународна соработка и пријателство“, изјави Ристевска-Петрушевска.
Претседателот на Советот на Општина Битола, Бојан Бојкоски, оцени дека усвојувањето на иницијативите покажува дека добрите идеи немаат политичка боја.
„Ќе продолжиме да ги поддржуваме сите квалитетни предлози кои носат подобар живот за битолчани“, порача Бојкоски.
На седницата беа усвоени и извештаи од општинските програми со реализација над 75 проценти.
