Меѓународната експертска проверка откри сомнителни медицински практики кај голем дел од анализираните кардиолошки случаи во земјава, при што девет од вкупно 13 предмети предизвикале сериозни дилеми околу оправданоста на извршените интервенции.
Резултатите од независната анализа денеска ги соопшти министерот за здравство Азир Алиу, кој истакна дека станува збор за случаи што претходно беа отворени по иницијатива на академик Сашо Кедев. Според него, утврдени се несогласувања меѓу ангиографските снимки и писмените медицински извештаи, што во одредени ситуации довело до интервенции за кои експертите сметаат дека не биле доволно оправдани.
Комисијата посочила и на пропусти во начинот на водење на пациентите, оценувајќи дека дел од клиничките одлуки не ги следеле очекуваните стручни стандарди. Таквите отстапувања, како што се наведува, можеби имале и негативно влијание врз исходот од лекувањето кај дел од пациентите на возраст меѓу 45 и 78 години.
Анализираните случаи опфаќаат интервенции изведени во повеќе здравствени установи низ државата, меѓу кои се Универзитетската клиника за кардиологија, Универзитетската клиника за кардиохирургија, болницата во Штип, ГОБ „8 Септември“, како и неколку приватни клиники, вклучувајќи ги „Кардио арт“, „Жан Митрев“ и „Аџибадем Систина“.
Министерот нагласи дека наодите се сериозни и бараат внимателен институционален пристап, но предупреди и дека не смеат да се користат за генерализирање или дискредитација на лекарската професија, посочувајќи дека поголемиот дел од здравствените работници работат професионално и одговорно.
Во работата на комисијата учествувале тројца странски експерти – кардиохирургот Уголини Ливи од Италија, кардиоваскуларниот хирург Никола Лакиќ од Словенија и интервентниот кардиолог Черчер Миха, исто така од Словенија. Таа била формирана во февруари со задача да обезбеди независна стручна проценка и да укаже на можни системски слабости во кардиолошката и кардиохируршката пракса.
Според министерството, заклучоците на меѓународните експерти во голема мера се поклопуваат со оние на домашната деветчлена комисија, што дополнително им дава тежина на утврдените сомнежи, иако секој тим работел одделно и без меѓусебно влијание.
Целиот материјал од проверката, заедно со деветте спорни случаи, ќе биде предаден на Владата, Јавното обвинителство, Антикорупциската комисија и другите надлежни органи, кои понатаму треба да утврдат дали постојат основи за кривична, дисциплинска или институционална одговорност.
…
