Во март годинава, земјата забележала нов туристички бран со 73.921 регистрирани посетители, кои заедно оствариле 134.233 ноќевања, покажуваат најновите податоци на Државниот завод за статистика.
Иако бројките укажуваат на солидна туристичка активност, структурата на посетителите повторно ја потврдува доминацијата на странските гости. Дури 80,3 проценти од сите туристи пристигнале од странство, додека домашните сочинуваат 19,7 проценти од вкупниот број. Слична слика се повторува и кај ноќевањата, каде странците учествуваат со 73,5 проценти, а домашните со 26,5 проценти.
Најголем „влез“ на странски туристи во март доаѓа од Германија, од каде се евидентирани 9.645 посетители. Веднаш зад неа се Турција со 9.090 гости, Франција со 4.945 и Србија со 3.955 туристи, што ја заокружува листата на најзначајни пазари за македонскиот туризам во тој месец.
Подолгорочниот тренд, пак, покажува умерено закрепнување на секторот. Во првите три месеци од 2026 година, бројот на туристи е зголемен за 5,2 проценти во споредба со истиот период лани. Растот е присутен и кај домашните и кај странските гости, иако странските повторно бележат поизразена динамика: 6,9 проценти наспроти 1,3 проценти кај домашните туристи.
Сепак, ова зголемување на пристигнувањата не се одразува исто и на должината на престојот. Вкупниот број ноќевања во истиот период бележи благ пад од 0,3 проценти. Домашните туристи поминале помалку ноќи во однос на лани (намалување од 1,2 проценти), додека кај странските се забележува само минимално зголемување од 0,2 проценти.
…
