Нови правила во областа на оружјето најави министерот за внатрешни работи Панче Тошковски, нагласувајќи дека целта е да се олеснат процедурите за граѓаните кои ги исполнуваат законските услови, но истовремено да се зајакне контролата врз поседувањето и употребата на оружје.
Тошковски говореше на свеченоста во Народниот театар во Велес по повод 80-годишнината од основањето на Ловечката федерација на Македонија. Тој им го честиташе јубилејот на членовите на Федерацијата и на генерациите ловци кои придонесувале за развојот на ловството во земјата.
Осврнувајќи се на реформите во областа на оружјето, министерот рече дека при преземањето на функцијата било утврдено оти повеќе од 5.000 граѓани ги исполнувале условите за добивање дозвола, но не ја добиле. Во исто време, според него, оружје поседувале и лица кои не требало да го имаат.
„Таков систем не е ни праведен, ни безбеден. Затоа го сменивме“, истакна Тошковски.
Една од новините е електронската платформа преку која ќе се поднесуваат барањата за набавка на оружје. Предвидено е и укинување на обврската за претходно одобрение за набавка на муниција, додека МВР преку централен електронски систем ќе има увид во набавените количини.
Новиот Закон за оружје предвидува и можност со едно барање да се побара набавка на повеќе парчиња оружје, како и регулирање на полнењето муниција.
Меѓу предложените промени е и проширувањето на сокорисничкото право, а рокот за регулирање на наследено оружје ќе биде продолжен од два на четири месеци.
Дополнително, предвиден е рок од една година за регулирање на одредени случаи во кои рокот бил пропуштен или барањето било одбиено поради истек на рокот. Ова се однесува и на оружје што треба да се легализира, пререгистрира или доброволно да се предаде.
Тошковски нагласи дека поедноставувањето на административните процедури не значи и попуштање во контролата.
„Секое олеснување за чесниот ловец оди заедно со построга контрола“, порача министерот.
Според него, со новиот закон ќе се овозможи електронско следење на оружјето од производството до крајниот корисник, а сопствениците ќе имаат обврска да го чуваат оружјето на безбеден и соодветен начин.
Законските измени ги опфаќаат и современите технологии. Тошковски посочи дека ќе се регулираат и оружје и делови изработени со 3Д печатачи и CNC машини, кои претставуваат нов предизвик во однос на времето кога бил донесен претходниот закон.
Министерот порача дека легалното оружје треба да биде во рацете на одговорни граѓани, додека за нелегалното оружје, како што нагласи, нема место во општеството.
„Доверба за тие што ги почитуваат правилата, нулта толеранција за тие што ги кршат“, истакна Тошковски.
Тој ја нагласи и потребата од континуирана соработка меѓу институциите, Ловечката федерација и ловечките друштва, со цел навремено да се утврдуваат евентуалните проблеми при примената на новите законски решенија.
На свеченоста во Велес, Тошковски уште еднаш го честиташе 80-годишниот јубилеј на Ловечката федерација, истакнувајќи ја улогата на ловците во познавањето и зачувувањето на природата.
„Ловецот најдобро ја познава оваа земја. Секоја планина, секоја долина, секоја патека. Можеби затоа најдобро и знае колку таа вреди“, порача Тошковски.
…
