Во Виена вечерва повторно ќе се насочи вниманието на европската публика кон сцената на Евровизија 2026, каде што се одржува второто полуфинале од годинешното издание. Спектаклот во легендарната „Винер Штадхале“ започнува во 21:00 часот, а во Македонија директниот пренос ќе биде достапен преку МТВ и Македонското радио.
Оваа вечер носи нова доза неизвесност: 15 земји излегуваат на сцената со една и единствена цел, да обезбедат место меѓу десетте преостанати финалисти. Само најуспешните ќе се приклучат на веќе избраната група која во сабота ќе се бори за трофејот.
Музичкиот редослед го отвора Бугарија со настапот на ДАРА и песната „Бангарaнга“, а потоа следуваат Азербејџан, Романија, Луксембург, Чешка, Ерменија, Швајцарија, Кипар, Латвија, Данска, Австралија, Украина, Албанија, Малта и Норвешка. Секоја земја носи свој сценски концепт, со надеж дека токму нивниот настап ќе го привлече вниманието на публиката и жирито.
Покрај натпреварувачкиот дел, вечерта ќе биде збогатена и со специјални ревијални настапи на неколку веќе директно пласирани земји во финалето. Франција ќе се претстави со Монро и песната „Регард!“, домаќинот Австрија со КОСМО и „Танцшајн“, а Обединетото Кралство со впечатлив и необичен перформанс насловен „Гледај мајка без компјутер“ и песната „Ајнс, Цвај, Драј“.
Организаторите најавуваат продукција на високо ниво — со комплексни светлосни ефекти, сценографија и динамична режија која треба да ја одржи енергијата на шоуто до последниот настап. Виена, како град-домаќин, веќе неколку дена живее во ритамот на евровизиската еуфорија, со илјадници фанови и делегации од целиот континент.
По првото полуфинале, местата во финалето веќе ги обезбедија Хрватска, Србија, Израел, Белгија, Финска, Грција, Литванија, Молдавија, Полска и Шведска, додека вечерва ќе се заокружи списокот на земји кои ќе настапат во големото финале.
Правилата за гласање остануваат непроменети: публиката ќе може да гласа преку телефон, СМС пораки или онлајн преку платформата esc.vote, и тоа веднаш по завршувањето на последниот настап. Секој гледач има можност да гласа до десет пати во краток временски прозорец од 20 минути.
Иако главниот товар е на публиката од земјите учеснички, право на глас во ова полуфинале имаат и Франција, Австрија и Обединетото Кралство. Дополнително, гледачи од земји кои не учествуваат во натпреварот ќе можат да се вклучат преку специјалниот онлајн систем на Евровизијата.
Големото финале на Евровизија 2026 е закажано за сабота, 16 мај, кога Европа ќе го добие новиот победник во јубилејното 70. издание на најголемото музичко телевизиско шоу на континентот.
…
